معلش مفيش صورة معاينه عشان انا كسلان بس دي عامة 3 مجموعات من الفرش خبطات على شروخ على كسور
نزلتها من ديفيان ارت

حمل الفرش

هشرح طريقة تركيب الفرش على امل اني ابدأ احط فرش في المدونة هنا مستقبلا للتحميل

ملفات الفرش لو نزلتها هتلاحظ انها ذات امتداد
.abr
مبحبش الدجل و التنجيم بس غالبا معناها ادوبي برش

الملفات دي مفروض تتحط في فولدر الفرش في فوتوشوب و اللي هيكون مساره
Presets\Brushes
داخل الفولدر بتاع الفوتوشوب ايا كان و اللي عاده هيكون في
program files
مالم يختار المستخدم غير ذلك

لكن عامه الخطوة دي مش مهمة
هي للتنظيم لا اكثر
نيجي بقى للمهم

افتح الفوتوشوب و امشي زي الصور دي



الخطوة واحد اختار اداة الفرش
الخطوة اتنين دوس السهم في اللي في الدايرة الحمرا
الخطوة تلاتة دوس السهم اللي في الدايرة الحمرا
الخطوة اربع اختار لود برش سيت
الخطوة الخامسه دور على مكان الفرشاء و اعملها لود
الخطوة السادسة انزل تحت في قائمة الفرش و هتلاقي الفرش الجديدة

الفرش استخدامتها كتير و بتتنوع بين عمل خلفيه لذيذة او شكل في التصميم
ان شاء الله قريب احط تشكيلة الفرش

أهلا بيكم فى أولى دروسى الفوتو شوبيه وإن شاء الله مش هيكون الأخير
فى البدايه احب ارحب بالأخ على اللى لولاه مكنتش كتبت فى المدونه دى
وثانيا أحب ارحب بأصدقاء المدونه الأعزاء
وأحب اشكر تانى الأخ على لأنه هو اللى معلمنى الدرس ده
نبدأ الدرس
الدرس هو عباره عن :
إزاى تعمل خيال حقيقى فى الفوتو شوب بدل من ال Shadow
اللى ممكن تعمله من ال Blending Options
الخطوه الأولى هنختار الصوره
وأنا اخترت صوره لكارتون محبب ليا

حمل الصورة من هنا
الصورة

الخطوه التانيه إننا نحدد الجسم اللى احنا عايزين نعمله الظل
بأى طريقه من طرق التحديد
ولإنه سهل تحديد الصوره دى فأنا حددتها ب
Magic wand tool
المهم هنوصل فى الأخر لنتيجه واحده وهى

هناخد الجزء ده كوبى ونفتح صوره جديده بأبعاد كبيره شويه

وبعدين نعمل paste للصوره فى الصوره الجديده
ونجيب الصوره لأحد الزوايا علشان يكون فى مساحه يظهر فيها الظل

بعد كده هنعمل
Duplicate layer
Right click > Duplicate layer

بعد كده هنيجى على اللاير الاصليه بتاعتنا
(اللى هى تحت)
Right click > Blending Opions

ومن القايمه هنختار
Color overlay
ونخلى اللون بتاعها أسود

ونعدل الشفافيه بتاعتها
Opacity ) )
ونخليها مثلا 25%

بعد كده معدش باقى لينا غير خطوه واحده وهى إننا نتخيل مصدر اتجاه الضوء على الصوره واللى هيخلى الظل بتاعنا يروح فى الاتجاه المعاكس له (أنا تخيلته إنه جاى من جهه الشمال الغربى )
بعدين هنعمل للاير بتاعتنا
Free transform
وده عن طريق إننا نضغط على
Ctlr+T
وده هيرسملنا مربع على اللاير من خلاله هنتحكم فى مكان الصوره

هنيجى فى أحد الجوانب ونميل الصوره شويه وبعدين نحركها ورا شويه
وهنحصل على الشكل ده

ايه رأيكو بقى
اتمنى يكون الدرس عجبكو واستفدتوا منه ولو القليل
اشكركوا انكم عبرتونى وقريتو الدرس
للتواصل:
www.elmansygenius.blogspot.com


******
شكرا للمنسي على الدرس و ياريت اللي عنده درس يبعته و يحذو حذو المنسي

خبر مالوش علاقة بالفوتوشوب بس متعلق بالعملاق ادوبي المنتج لفوتوشوب

مشغل الفيديو الجديد مش مميز جدا على الجانب التشغيل العادي
في الواقع ويندوز ميديا بلاير و بي اس بلاير افضل منه كتير
انما مع الحاجت اللي ممكن يعرضها اون لاين و منها الحلقات الكاملة من بعض اشهر المسلسلات الامريكية و القنوات و برامجها

System requirements

• Intel® Pentium® 4 2.33GHz or faster processor
• Microsoft® Windows® XP with Service Pack 2 or Windows Vista® Home, Business, or Ultimate
• 1GB of RAM and 64MB of VRAM

http://get.adobe.com/amp/
حملوه من هنا لو حبيتوا بس هو فاشل و ميستاهلش اطلاقا و كمان هينزل معاه ادوبي اير

عشان يبقى البوست ليه فايده بذكر بهذا البوست
http://photoshopkorkor.blogspot.com/2008/02/blog-post_25.html